PODES DESCARGAR O TRIVIAL VIAXEIRO AQUÍ

Aquí vos presentamos outra proposta, agardamos que entretida, baseada nos contidos e as dinámicas que se desenvolven durante as sesións do conto viaxeiro. Nesta ocasión usamos o clásico xogo do Trivial adaptándoo con só catro bloques de contidos: Lingua e Literatura, Santiago de Compostela, Ciencias Naturais e Ciencias Sociais. As preguntas están pensadas para rapazada de cuarto de primaria, que é o nivel que participa nesta actividade, pero estamos certos que xogando en familia ha resultar interesante e divertido para todos os públicos.
Así que nada, xa sabedes, descargádeo, imprimide e a xogar!!

Que precisamos para construír unha historia? Pois basicamente a nosa cabeciña para ir creando ou recreando nela os diferentes ingredientes que adoitan compoñer un conto: lugares e personaxes… cantos queiramos (depende das ganas de crear que teñamos e do longa que vaia ser a narración); un tempo… se cadra; algún problema, para darlle vida ao asunto, e logo accións, moitas accións para resolver todos os disparatados problemas en que acabamos metendo os personaxes.

Entre outros obxectivos, o conto viaxeiro intenta estimular a creatividade, ao tempo que se repasan contidos curriculares de Lingua, Literatura, Ciencias Naturais ou Ciencias Sociais. Tratamos por exemplo os textos narrativos, a fauna e a flora e historia e patrimonio. E claro, como se fai nos coles de Compostela, procuramos sempre que a rapazada coñeza o que ten máis á man. Desta experiencia, intentando atopar vías atraentes e divertidas para que as nenas e nenos desfruten creando, nacen ideas para xogar coma estes dados que agora vos deixamos aquí, por se vos apetece probar en familia ou cos amigos a crear tamén vós as vosas historias compostelás.

Que como se xoga? Ben doado. Só cómpre lanzar os dados e a figura que apareza daravos pé para ir construíndo unha parte da historia, que a seguinte persoa en lanzar outro dado terá á súa vez que continuar. E así ata rematar a historia cando o consideredes.

Que vos preste! (Ah, e en nadiña teremos outra cousa para vós, estade atent@s!!)

DESCARGAR AQUÍ O DADO DE PERSONAXES
DESCARGAR AQUÍ O DADO DE LUGARES

O videoconto 2019 está aquí:

Pois si! Aquí está o novo conto viaxeiro!!! Mirade que traballón!

Que? Como foi o verán? Xa había ganiñas de voltar á rutina ou aínda botabades uns mesiños máis á ransoña?

Nós voltamos por aquí porque, por se non o lembrabades, este ano o Conto Viaxeiro anda a cabalo de dous cursos. Isto significa que a rapazada xa fixo o seu traballo creativo e agora tócanos a nós darlle os últimos retoques para vos entregar ben empaquetadiñas, en forma de libro e de videoconto, as aventuras de Valeria e Max contra os seus inimigos (ou amigos, que a cousa non quedaba clara). Si podemos adiantar que contra o final o asunto colle un camiño inesperado, sorprendente e revelador, como lle cómpre a unha boa historia curta.

Ademais do conto e o videoconto, andamos tamén a voltas cun par de argalladas das que xa saberedes no seu momento, e que habedes ter neste blog para descarga. Serán recursos que teñen a ver cos contidos cos que xogabamos nas sesións, como por exemplo a creación de espazos e  personaxes. E, falando de xogar. Botádelle un ollo a este breve vídeo de preguntas e respostas e participade (as respostas comezan a partir dos 31 segundos)

Pois ben, o Conto Viaxeiro 2019 xa está escrito e ilustrado, mais como sabedes, este ano imos andar a cabalo entre dous cursos. Tedes que agardar entón ao próximo setembro para coñecerdes o desenlace desta apaixonante historia. A quen nos seguides a través das redes, o misterio hásevos desvelar mediante o videoconto; as creadoras e os creadores recibirán nos seus colexios cadanseu exemplar do traballo.

Despedímonos ata daquela, desexándovos a tod@s un moi bo verán, pero facémolo cunha migalliñas do final para deixarvos con ganas de nos reecontrarmos á volta das vacacións. Que o pasedes ben!!