O noso conto empeza a coller ás! Tantas que xa chegou ata a Selva Negra, no Monte Pedroso. Alí é onde as nenas e nenos do CEIP Raíña Fabiola enviaron ao noso protagonista, o alegre Adán:

 Un día foi á Selva Negra mirar a ver se atopaba ouro.

Ademais, escolleron a ilustración para o conto final de entre as que fixo o alumnado do Apóstolo Santiago, a de Mara. Que vos parece? Está ben guapa! As outras tampouco quedan atrás… Xa podedes velas todas na exposición virtual. E tamén as fotografías que lles sacamos aos rapaces ao longo da xornada.

Hoxe o conto viaxa ata Lavacolla, ao CEIP Rodríguez Xixirei. A ver o que argallan por aquelas terras…

A rapazada do Apóstolo Santiago fixo o que tiña que facer e ademais fíxoo de marabilla! Xa temos protagonista! Un ourive moi rideiro que percorre as rúas de Compostela en patinete e que ademais cociña que dá gusto… Así é como comeza este conto viaxeiro:

 Adán era un ourive moi alegre que andaba en patinete e gustáballe cociñar.

Xa logo poderedes verlle a cara a Adán nas ilustracións que fixeron as rapazas e rapaces do Apóstolo Santiago -a nós deixáronnos abraiados- e seguir as imaxes do proceso creativo.

Hai ganiñas de saber máis, non si? Pois a ver que nos contan hoxe no Raíña Fabiola…

Ata a volta!

Dende hoxe e ao longo de 16 xornadas un novo conto viaxeiro percorrerá Compostela. Aquí podedes ver a folla de ruta. A partida será desta volta no monte da Almáciga, onde as rapazas e rapaces de 1º e 2º de Primaria do CEIP Apóstolo Santiago teñen a misión de dar vida á/ao protagonista desta historia. Alá imos!

Xa podedes ver e escoitar o traballo destas rapazas e rapaces contado por eles mesmos que, ao cabo, son os verdadeiros protagonistas do conto:

A historia de Enma, Emilio e as pombas da catedral xa está engarzada e axeitada nun libro! O conto que ao longo do pasado mes de maio artellaron con empeño e imaxinación as rapazas e rapaces do Colexio San Paio, CEIP Apóstolo Santiago, CEIP de Vite, CSC das Fontiñas, CEIP Rodríguez Xixirei, CSC de Vite e CSC de Santa Marta xa pode lerse online e compartirse con quen se queira!

Botádelle un ollo e descubride o segredo das pombas da catedral:

Rodrigo e Salomé uniron forzas o pasado xoves no Centro Sociocultural de Santa Marta para atopar o tesouro das pombas da catedral que poñía fin ao noso conto viaxeiro. E abofé que o atoparon! Queredes saber cal é? Pois ímonos facer de rogar un pouquiño… moi pouquiño… En breve estará publicado o conto e actualizado o videoconto e xa poderedes ver como acabou esta aventura. Estamos seguras de que ides gustar!

Mentres podedes dar unha voltiña pola sección de fotos e ver como transcorreron as últimas sesións, ou abraiar coas ilustracións que fixeron os rapaces. Por certo, Salomé e Rodrigo escolleron para o conto final o debuxo de Inés Leila Mebdoua, do CSC de Vite.