O mércores visitamos por primeira vez o CEE Manuel López Navalón e quedamos encantados. Mirade canto deron de si as dúas sesións:

Lucente contoulles como no seu planeta a Doutora XXL acabara coas bibliotecas, coa arte e mesmo coa lingua. Agora era o Planeta da Escuridade. Non podían permitir que fixese o mesmo coa Terra!

Mentres estaban a falar viron a gran nave da malvada Doutora aterrar na Alameda. Correron cara alí para enfrontarse a ela. Cando chegaron, xa non estaba. Entón Lucente tivo unha idea:

- Co meu raio podo facer que estas estatuas revivan e igual elas viron por onde escapou esa malvada. As estatuas eran as Marías.

As Marías, agradecidas por lles devolveren a vida, dixéronlles que a malvada escapara cara á catedral. Xa na catedral, deron con ela nas catacumbas. 

Papelín atacouna co seu superpapel, pero a Doutora XXL protexíase cun cristal no que o papel rebotaba.

Entón Lucente lanzou un raio co que conseguiu romper o cristal da Doutora e Papelín e mais Supertoalliña lograron detela.

Que emoción!!!! Estamos a nada de rematar o conto e iso nótase :D Hoxe poñémoslle o FIN en Roxos!

Os debuxos elixidos desta volta foron os de Uxía, do Rodríguez Xixirei e o de José M. do mesmo CEE Manuel López Navalón.

Papelín e Toalliña, alleos ás artimañas da Doutora XXL, correron a depositar a bomba na Galaxia Plutonio, porque estaba xa a piques de estoupar.

De volta para a Terra, cando estaban a aterrar na Lavacolla, un alieníxena do Planeta Luz que se chamaba Lucente alertounos de que a Doutora XXL ía facer xigantes malvados co papel que lle deran a Bluexín.

Que vos parece? Xa nos daba o corpo que na Lavacolla habían traballar con xeito :D

O debuxo escollido desta volta foi o de Aarón, do CEIP de Vite.

Hoxe temos sesión dobre no CEE Manuel López Navalón. Aaai, que ganiñas de saber o que vai pasar!

Pois como se agardaba, en Vite déronlle ben á cachola e velaquí o resultado:

En realidade Bluexín era un esbirro da Doutora XXL, que quería destruír toda a cultura da Terra. 

Con ese anaco de papel ía crear un exército de xigantes que lanzaban raios XXL polos ollos para acabar con Papelín Papelón, o seu principal obstáculo.

E decidiron que fose o debuxo de Sergio Senra Barrantes do Colexio San Jorge o que formase parte do conto final.

Hoxe imos andar por Lavacolla! Agárdanos a rapazada do Rodríguez Xixirei, que son uns conteiros de medo… Seguro que nos sorprenden :D.

Cando xa estaban collendo impulso para atravesar a estratosfera, alguén os detivo: un alieníxena azul chamado Bluexín. 

Cunha pistola de pompas atacounos e encerrounos nunha delas.

Bluexín levounos ao planeta XXL e meteunos nunha cela.

Papelín e Toalliña intentaron convencelo para que os liberase, pero Bluexín non cedía. Entón ensináronlle a bomba por entre os barrotes da cela e asustárono para que os deixase saír. Empezaron a falar:

- Temos unha bomba e pode explotar en calquera momento. – Dixéronlle os dous amigos.

- Moi ben, ceivareivos, pero a cambio dun anaquiño do teu papel. 

Papelín deulle o anaquiño de papel e Bluexín liberounos.

Moito lle dan á cabeza no Colexio San Jorge! E inda tiveron tempo de escoller as ilustracións do conto final: a de Noa MF da Milagrosa e mais a de Mara Prieto Rey do mesmo San Jorge. Moitos parabéns, artistas!

Hoxe levamos esta historia intergaláctica a Vite, a ver que nos depara a mañá!

Papelín Papelón era un superheroe, pero non sabía nada de desactivar bombas. Entón chamou a Supertoalliña para que lle axudase a levar a bomba ao depósito de bombas que estaba nunha galaxia moi distante onde non vivía ninguén: a Galaxia Plutonio! Ían chegar alí empregando as súas botas propulsoras.

Así continuaron o conto o pasado luns as nenas e nenos do CEIP Pío XII pola mañá e do Colexio A Milagrosa pola tarde.

Moitas novidades nos trouxeron… Unha afouta compañeira para Papelín, unha galaxia descoñecida e mesmo un supercomplemento de moita utilidade: botas propulsoras! Isto ponse interesante…

Ademais, escolleron os debuxos de Ariadna do Divino Mestre e de Nuria Blanco Moure do Pío XII.

Hoxe o conto viaxa ata o Colexio San Jorge nunha sesión dobre que seguro que non decepciona.

O mércores pasámolo moi ben coa rapazada do CPR Divino Mestre. Traballaron e discurriron moito. Queredes saber como continúa o conto? Pois mirade, mirade:

Unha mañá que estaba a vixiar a cidade, atopou unha bomba na Cidade da Cultura cun temporizador que poñía que ía estourar en dúas semanas se non se impedía!

Esa é unha misión para Superpapelín! Que fará para evitar que a bomba estoure? Habémolo saber hoxe despois de pasar polo CEIP Pío XII e polo Colexio A Milagrosa.

No Divino Mestre escolleron tamén o debuxo que ilustrará o conto final de entre todas as artistadas que fixeron no Colexio Nosa Señora dos Remedios: este papelín costureiro de Elena Lago López.